ಪುರಂದರದಾಸರ ಹೆಸರಿನಲ್ಲಿ ಪ್ರಾಧಿಕಾರ ಸ್ಥಾಪಿಸಬೇಕು- ಆದಿಚುಂಚನಗಿರಿ ಮಠದ ನಿರ್ಮಲಾನಂದ ಸ್ವಾಮೀಜಿ ಒತ್ತಾಯ…

ತೀರ್ಥಹಳ್ಳಿ: ಪುರಂದರದಾಸರು ನಾದೋಪಾಸನೆ ಮಾರ್ಗದ ಮೂಲಕ ಭಗವಂತನನ್ನು ಸಮೀಕರಿಸಿದರು. ಕರ್ನಾಟಕ ಸಂಗೀತಕ್ಕೆ ದಿಕ್ಕು ನೀಡಿದ ಪುರಂದರದಾಸರ ಹೆಸರಿನಲ್ಲಿ ಸರ್ಕಾರ ಪ್ರಾಧಿಕಾರ ಸ್ಥಾಪಿಸಬೇಕು ಎಂದು ಆದಿಚುಂಚನಗಿರಿ ಮಠದ ನಿರ್ಮಲಾನಂದನಾಥ ಸ್ವಾಮೀಜಿ ಸರ್ಕಾರವನ್ನು ಒತ್ತಾಯಿಸಿದರು.

ಆರಗದ ಸಹಕಾರ ಸಂಘದ ಸಭಾಭವನದಲ್ಲಿ ಮಂಗಳವಾರ ನಡೆದ ಆದಿಚುಂಚನಗಿರಿ ಶಿವಮೊಗ್ಗ ಶಾಖಾ ಮಠದ 35ನೇ ವಾರ್ಷಿಕೋತ್ಸವ ಅಂಗವಾಗಿ ಹಮ್ಮಿಕೊಂಡಿದ್ದ ದಾಸವರೇಣ್ಯ ಪುರಂದರದಾಸರ ಕೀರ್ತನೋತ್ಸವ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು.

ಶ್ರಮವಹಿಸಿ ಉತ್ಖನನ ನಡೆಸಿದರೆ ಚಿನ್ನ ಲಭಿಸುತ್ತದೆ. ಯೂರೇನಿಯಂ ವರ್ಷವಿಡಿ ಬೆಳಕು ನೀಡುವ ಶಕ್ತಿ ಹೊಂದಿದೆ. ಅದರ ಸಣ್ಣ ತುಂಡಿನಿಂದ ಬಾಂಬ್ ಕೂಡ ಮಾಡಬಹುದು. ಸರಳತೆ ಸಾಮಾನ್ಯ ಸ್ಥಿತಿಯಲ್ಲ. ಸರಳವೆಂದು ನಾವು ಅಂದುಕೊಂಡರೆ ಅದರಿಂದ ಕಟ್ಟಬಹುದು ಅಥವಾ ಕೆಡವಲುಬಹುದು. ಆದ್ಯಾತ್ಮದ ಹಸಿವು ಕೂಡ ಕಷ್ಟ. ನವಕೋಟಿ ನಾರಾಯಣ ಆಗರ್ಭ ಶ್ರೀಮಂತಿಕೆ ತೊರೆದ ಪರಿ ಹೀಗೆ ಎಂದು ಅವರು ವರ್ಣಿಸಿದರು.

14ನೇ ಶತಮಾನದ ಸಮಕಾಲೀನ ಇತಿಹಾಸ ಗಮನಿಸಿದರೆ, ಭಾರತ ಎಷ್ಟು ಪ್ರಭುದ್ದವಾಗಿ ಯೋಚಿಸುತ್ತಿತ್ತು ಎಂಬುದನ್ನು ಕೀರ್ತನೆಗಳು ತಿಳಿಸುತ್ತವೆ. ವಿಜ್ಞಾನ, ತಂತ್ರಜ್ಞಾನ, ಅಧ್ಯಾತ್ಮ ಪರಸ್ಪರ ಹೊಂದಾಣಿಕೆ ಇದೆ. ಒಂದನ್ನು ಬಿಟ್ಟು ಮತ್ತೊಂದು ಇರಲು ಸಾಧ್ಯವಿಲ್ಲ. ಲಕ್ಷಾಂತರ ಕೀರ್ತನೆಗಳು ಸರಳ ಜೀವನ ಮಾರ್ಗವನ್ನು ತೋರಿಸುವ ಜೊತೆಗೆ ಇಂದಿಗೂ ಪ್ರಸ್ತುತವಾಗಿದೆ ಎಂದರು.

ವಿಜಯನಗರ ಸಾಮಾಜ್ಯದಲ್ಲಿ ವಜ್ರ ವೈಡೂರ್ಯಗಳ ವ್ಯಾಪಾರ ನಡೆಯುವ ಹೊತ್ತಿಗೆ ಅಮೇರಿಕಾ ದೇಶ ಹುಟ್ಟಿರಲಿಲ್ಲ. ವಿಶ್ವದಾದ್ಯಂತ ಪುರಂದರರ ಸಮಕಾಲೀನರು ಅನ್ವೇಷಣೆಗೆ ಹೊರಡುವ ಹೊತ್ತಿಗೆ ಸೃಷ್ಟಿಸಿದ ಪದ್ಯಗಳು ಇಂದಿಗೂ ವಿಜ್ಞಾನಕ್ಕೆ ಸವಾಲಾಗುವಂತಿದೆ. ಅಷ್ಟೊಂದು ವೈಜ್ಞಾನಿಕವಾಗಿ ದಾಸ ಸಾಹಿತ್ಯ ರಚನೆಯಾಗಿದೆ. ಆರಗ ಐತಿಹ್ಯ ಇಂದಿಗೂ ಸ್ಮರಣೀಯ. ಶಾಂತವೇರಿ ಗೋಪಾಲಗೌಡರನ್ನು ದೆಹಲಿಯಲ್ಲಿಯೂ ನೆನಪಿಸುತ್ತಾರೆ ಎಂದು ಹೇಳಿದರು.

ಶಿವಮೊಗ್ಗ ಆದಿಚುಂಚನಗಿರಿ ಶಾಖಾ ಮಠದ ಪ್ರಸನ್ನನಾಥ ಸ್ವಾಮೀಜಿ, ಶಾಸಕ ಆರಗ ಜ್ಞಾನೇಂದ್ರ, ಶಿವಮೊಗ್ಗ ಶಾಸಕ ಚನ್ನಬಸಪ್ಪ, ಮಾಜಿ ಸಚಿವ ಕಿಮ್ಮನೆ ರತ್ನಾಕರ, ಎಂಎಡಿಬಿ ಅಧ್ಯಕ್ಷ ಆರ್.ಎಂ. ಮಂಜುನಾಥ ಗೌಡ, ರಾಜ್ಯ ಒಕ್ಕಲಿಗರ ಸಂಘದ ನಿರ್ದೇಶಕ ಸಿರಿಬೈಲು ಧರ್ಮೇಶ್ ಮಾತನಾಡಿದರು.

ಮಾಜಿ ಸಚಿವ ಕಿಮ್ಮನೆ ರತ್ನಾಕರ್ ಮಾತನಾಡಿ ಧರ್ಮ, ಜಾತಿ ಆಧರಿಸಿ ಸಮಾಜದ ಪ್ರಗತಿ ಸಾಧ್ಯವಿಲ್ಲ. ರಾಜಕಾರಣಿಗಳಿಂದ ಎಲ್ಲರನ್ನು ಒಗ್ಗೂಡಿಸಲು ಆಗುವುದಿಲ್ಲ. ಮನುಷ್ಯ ಸಂಬಂಧ ಗಟ್ಟಿಗೊಳಿಸಲು ದಾರ್ಶನಿಕರು, ಧರ್ಮಗುರುಗಳಿಂದ ಸಾಧ್ಯ. ಪುರಂದರದಾಸರ ಕೀರ್ತನೆಗೆ ಅಂತಹ ಶಕ್ತಿ ಇದೆ ಎಂದರು.

ಡಿಸಿಸಿ ಬ್ಯಾಂಕ್ ಅಧ್ಯಕ್ಷ ಆರ್‌ಎನ್ ಮಂಜುನಾಥಗೌಡ ಮಾತನಾಡಿ ಮಾಜಿ ಶಾಸಕ ಪಟಮಕ್ಕಿ ರತ್ನಾಕರ, ಹಿರಿಯ ಸಹಕಾರಿ ನಾಯಕ ಬಿ.ಎಸ್.ವಿಶ್ವನಾಥನ್ ಪುರಂದರರ ಹುಟ್ಟೂರು ಬಗ್ಗೆ ಅನೇಕ ಸಂಗತಿಗಳನ್ನು ಸರ್ಕಾರದ ಮುಂದಿಟ್ಟಿದ್ದಾರೆ. ಅದರಿಂದ ಶೋಧನಾ ಸಮಿತಿ ರಚಿಸಲು ಸಾಧ್ಯವಾಯಿತು. ಪುರಂದರರ ಹುಟ್ಟೂರು ಬಗ್ಗೆ ಸರ್ಕಾರ ಅಧಿಕೃತ ಆದೇಶ ಪ್ರಕಟಿಸಬೇಕು ಎಂದರು.

ವೇದಿಕೆಯಲ್ಲಿ ವಿವಿಧ ಮಠಗಳ ಸ್ವಾಮೀಜಿಗಳು ಇದ್ದರು. ವೇದಿಕೆ ಕಾರ್ಯಕ್ರಮದ ನಂತರ ಕೀರ್ತನೋತ್ಸವ ನಡೆಯಿತು. ಸ್ಪರ್ಧೆಯಲ್ಲಿ ಭಾಗವಹಿಸಿ ಬಹುಮಾನ ಪಡೆದ ವಿದ್ಯಾರ್ಥಿಗಳಿಗೆ ಬಹುಮಾನ ವಿತರಿಸಲಾಯಿತು.