ಮಾತೃ ವಾತ್ಸಲ್ಯ ಆಸ್ಪತ್ರೆ ವೈದ್ಯರ ಅಪರೂಪದ ಶಸ್ತ್ರ ಚಿಕಿತ್ಸೆ ಯಶಸ್ವಿ…

ಶಿವಮೊಗ್ಗದ ಮಾತೃ ವಾತ್ಸಲ್ಯ ಆಸ್ಪತ್ರೆಯಲ್ಲಿ ಅಪರೂಪದ ಮತ್ತು ಅತ್ಯಂತ ಅಪಾಯಕಾರಿ ಎಂದು ಪರಿಗಣಿಸಲಾಗುವ ತ್ರಿವಳಿ ಹೆರಿಗೆಯನ್ನು ಪ್ರಸೂತಿ ಮತ್ತು ಸ್ತ್ರೀ ರೋಗ ತಜ್ಞರಾದ ಡಾ. ನಾಗಮಣಿ ರವರಿಂದ ಯಶಸ್ವಿಯಾಗಿ ಮಾಡಲಾಗಿದೆ.

22 ವರ್ಷದ ಶ್ರೀಮತಿ ಸಹನಾ ಸುನಿಲ್ ಕುಮಾರ್ ಅವರು ಗರ್ಭಾವಸ್ಥೆಯ 3 ನೇ ತಿಂಗಳಲ್ಲಿ ಆಸ್ಪತ್ರೆಗೆ ಭೇಟಿ ನೀಡಿದಾಗ ಮಾಡಿದ ಸ್ಕ್ಯಾನ್‌ನಲ್ಲಿ ಮೂರು ಗರ್ಭಗಳು (Triplets) ಇರುವುದನ್ನು ಪತ್ತೆ ಹಚ್ಚಲಾಯಿತು.
ಅವಳಿ ಜವಳಿ ಗರ್ಭದಲ್ಲಿಯೇ ಅಪಾಯ ಹೆಚ್ಚಿರುತ್ತದೆ; ಅಂತಹದರಲ್ಲಿ ತ್ರಿವಳಿ ಗರ್ಭ ತಾಯಿ ಮತ್ತು ಶಿಶುಗಳಿಗೆ ಅತ್ಯಂತ ಗಂಭೀರವಾದ ತೊಂದರೆಗಳು ಉಂಟಾಗುವ ಸಾಧ್ಯತೆ ಅತೀ ಹೆಚ್ಚು.

ಸಾಮಾನ್ಯವಾಗಿ ಇಂತಹ ಸಂದರ್ಭಗಳಲ್ಲಿ foetal reduction ಮಾಡಿ ಒಂದು ಅಥವಾ ಎರಡು (ಅವಳಿ ಜವಳಿ) ಗರ್ಭವನ್ನು ಮುಂದುವರೆಸಲು ಸಲಹೆ ನೀಡಲಾಗುತ್ತದೆ.ಆದರೆ ಕುಟುಂಬದ ಒಪ್ಪಿಗೆ ಇಲ್ಲದ ಕಾರಣ, ಮೂರೂ ಗರ್ಭಗಳನ್ನು ಮುಂದುವರಿಸಿ ಅತ್ಯಂತ ಕಾಳಜಿ ವಹಿಸಲು ನಿರ್ಧರಿಸಲಾಯಿತು.

ಇವರಿಗೆ ರಕ್ತ ಗುಂಪು O ನೆಗೆಟಿವ್ ಇದ್ದು, ಇದರಿಂದ ತಾಯಿ ಮತ್ತು ಮಕ್ಕಳಿಗೆ ಕೆಲವೊಂದು ರೀತಿಯ ಸಮಸ್ಯೆಗಳು ಉಂಟಾಗುವ ಸಾಧ್ಯತೆ ಕೂಡ ಇತ್ತು .

ಚಿಕಿತ್ಸೆಯ ಕ್ರಮ…

ತ್ರಿವಳಿ ಗರ್ಭದಲ್ಲಿ ಅವಧಿಗೆ ಮುಂಚಿತ ಹೆರಿಗೆ (Preterm delivery) ಸಾಧ್ಯತೆ ಜಾಸ್ತಿ ಇರುವ ಕಾರಣ, 5 ನೇ ತಿಂಗಳಲ್ಲಿ Cervical Encirclage (ಗರ್ಭಕಂಠಕ್ಕೆ ಹೊಲಿಗೆ) ಮಾಡಿ
ಗರ್ಭವನ್ನು ಸ್ಥಿರಗೊಳಿಸಲಾಯಿತು. ನಂತರದಲ್ಲಿ ನಿರಂತರವಾಗಿ ಸ್ಕ್ಯಾನಿಂಗ್, ತಾಯಿ ಮತ್ತು ಮಕ್ಕಳ ಉತ್ತಮ ಆರೋಗ್ಯಕ್ಕೆ ಬೇಕಿರುವ ಆಹಾರ ಕ್ರಮ, ಪೋಷಕಾಂಶಗಳು ಮತ್ತು ಅಗತ್ಯ ಔಷಧೋಪಚಾರಗಳೊಂದಿಗೆ 8 ನೇ ತಿಂಗಳವರೆಗೆ ಸುರಕ್ಷಿತವಾಗಿ ಗರ್ಭಧಾರಣೆ ಮುಂದುವರಿಸಲಾಯಿತು.

ಬಳಿಕ ಶಿಶುಗಳ ಶ್ವಾಸಕೋಶ ಬೆಳವಣಿಗೆಗೆ ಅಗತ್ಯವಾದ ಸ್ಟಿರಾಯ್ಡ್ ಇಂಜೆಕ್ಷನ್ ಕೂಡ ನೀಡಲಾಯಿತು.
ಸಿಸೇರಿಯನ್ ಹೆರಿಗೆ:
34 ವಾರ ತುಂಬಿದ ನಂತರ ಅತ್ಯಂತ ಎಚ್ಚರಿಕೆಯಿಂದ ಸಿಸೇರಿಯನ್ ಮೂಲಕ ಹೆರಿಗೆ ಮಾಡಲಾಯಿತು.

ತ್ರಿವಳಿ ಗರ್ಭದಲ್ಲಿ ಗರ್ಭಕೋಶ ಅತಿಯಾಗಿ ವಿಸ್ತಾರಗೊಳ್ಳುವುದರಿಂದ ಅಧಿಕ ರಕ್ತಸ್ರಾವ, ರಕ್ತದೊತ್ತಡದ ಏರುಪೇರು,ಸೋಂಕು ಮುಂತಾದ ಅಪಾಯ ಇರುತ್ತದೆ. ಶಸ್ತ್ರಚಿಕಿತ್ಸೆಯ ವೇಳೆ ಕೆಲವು ಔಷಧಗಳು ಹಾಗೂ ವಿಶೇಷ ರೀತಿಯ ಹೊಲಿಗೆ ಹಾಕಿ ರಕ್ತ ಸ್ರಾವವನ್ನು ಯಶಸ್ವಿಯಾಗಿ ನಿಯಂತ್ರಿಸಲಾಯಿತು.

ಅರವಳಿಕೆ ತಜ್ಞರಾದ ಡಾ. ರವೀಂದ್ರ ಅವರಿಂದ ಶಸ್ತ್ರಚಿಕಿತ್ಸೆ ಸಂದರ್ಭದಲ್ಲಿ ಉತ್ತಮ ನಿರ್ವಹಣೆ ಮಾಡಲಾಯಿತು. ಶಸ್ತ್ರಚಿಕಿತ್ಸೆ ಬಳಿಕ ರಕ್ತದೊತ್ತಡ ಹೆಚ್ಚಾಗಿದ್ದರಿಂದ ಇವರಿಗೆ ಮೆದುಳಿಗೆ, ಹೃದಯಕ್ಕೆ, ಕಿಡ್ನಿ ಗೆ, ರಕ್ತನಾಳಗಳಿಗೆ ತೊಂದರೆ, ಫಿಟ್ಸ್ ಬರುವ ಸಾಧ್ಯತೆ ಇರುವ ಕಾರಣ ವಿಶೇಷ ಔಷಧಿ ನೀಡಿ ತೀವ್ರವಾದ ಕಾಳಜಿ ವಹಿಸಲಾಯಿತು

ಜನ್ಮ ಪಡೆದ ಮಕ್ಕಳು:
• ಎರಡು ಗಂಡು ಮಕ್ಕಳು
• ಒಂದು ಹೆಣ್ಣು ಮಗು

ಹುಟ್ಟಿದ ನಂತರ ಮೂರು ಮಕ್ಕಳನ್ನು ಸುರಕ್ಷತೆಗಾಗಿ NICU ಯಲ್ಲಿ ಮಕ್ಕಳ ತಜ್ಞೆ ಡಾ. ಶ್ವೇತಾ ಮತ್ತು ತಂಡದಿಂದ ಉತ್ತಮ ಆರೈಕೆ ಮಾಡಲಾಯಿತು. ಈಗ ತಾಯಿ ಮತ್ತು ಮೂರು ಮಕ್ಕಳೂ ಆರೋಗ್ಯವಾಗಿದ್ದಾರೆ.

⸻
ಮಾತೃ ವಾತ್ಸಲ್ಯ ಆಸ್ಪತ್ರೆ , ಶಿವಮೊಗ್ಗ